15 February, 2018

ജനപ്രതിനിധികളുടെ ശില്പശാല 15.02.2018


2018-19 വർഷത്തെ പഞ്ചായത്ത് വിദ്യാഭ്യാസ പദ്ധതി സർവശിക്ഷാ അഭിയാനുമായി സംയോജിപ്പിച്ച് മികവുറ്റതാക്കി മാറ്റാനുള്ള കർമപരിപാടികൾക്ക് രൂപം നൽകാൻ ജനപ്രതിനിധികളുടെ ശില്പശാല. സർവശിക്ഷാ അഭിയാൻ ചെറുവത്തൂർ ബി ആർ സി യുടെ ആഭിമുഖ്യത്തിലാണ് ചെറുവത്തൂർ ഉപജില്ലയിലെ ആറ് ഗ്രാമപഞ്ചായത്തുകളിലെ പ്രസിഡൻറുമാർ, വൈസ് പ്രസിഡന്റുമാർ, വിദ്യാഭ്യാസ സ്റ്റാന്റിംഗ് കമ്മിറ്റി ചെയർമാൻമാർ, വിദ്യാഭ്യാസ  നിർവഹണ ഉദ്യോഗസ്ഥർ, പഞ്ചായത്ത് _ പി ഇ സി സെക്രട്ടറിമാർ എന്നിവർക്കായാണ് ഏകദിന ശില്പശാല സംഘടിപ്പിച്ചത്.പൊതു വിദ്യാഭ്യാസ സംരക്ഷണ യജ്ഞത്തിന്റെ ഭാഗമായി സംസ്ഥാന സർക്കാരും തദ്ദേശസ്വയംഭരണ സ്ഥാപനങ്ങളും വിവിധ ഏജൻസികളും പൊതുസമൂഹവും കൈകോർത്തു പിടിച്ച് പൊതുവിദ്യാലയങ്ങളെ മികവിന്റെ കേന്ദ്രങ്ങളാക്കി മാറ്റുന്നതിന് നടത്തുന്ന പ്ര വർത്തനങ്ങളെ ശില്പശാല അവലോകനം ചെയ്തു. എസ്എസ്എ പദ്ധതിക്ക് വിവിധ ഗ്രാമ പഞ്ചായത്തുകൾ നീക്കിവെക്കേണ്ടുന്ന 40 ശതമാനം വിഹിതം യഥാസമയം ലഭ്യമാക്കുമെന്നും യോഗത്തിൽ ജനപ്രതിനിധികൾ ഉറപ്പു നൽകി. സർവശിക്ഷാ അഭിയാന് നൽകേണ്ട ഫണ്ട് വെട്ടിക്കുറച്ച കേന്ദ്ര സർക്കാർ നടപടിയിൽ ജനപ്രതിനിധികൾ ശക്തമായി പ്രതിഷേധിച്ചു.
         ബിപിഒ   കെ നാരായണൻ അധ്യക്ഷനായിരുന്നു.എസ് എസ് എ ജില്ലാ പ്രോഗ്രാം ഓഫീസർ ഡോ.എം വി ഗംഗാധരൻ ആമുഖഭാഷണം നടത്തി. ബി ആർ സി പരിശീലകൻ പി വി ഉണ്ണിരാജൻ ക്ലാസെടുത്തു. ഗ്രാമ പഞ്ചായത്ത് പ്രസിഡൻറുമാരായ കെ ശകുന്തള, എം ടി അബ്ദുൽ ജബ്ബാർ, വി പി ഫൗസിയ എന്നിവർ സംസാരിച്ചു.ബി ആർ സി പരിശീലകൻ പി വേണുഗോപാലൻ സ്വാഗതം പറഞ്ഞു.

14 February, 2018

KHO-KHO TOURNAMENT 10.02.2018

സർവ്വശിക്ഷ അഭിയാന്റെ ആഭിമുഖ്യത്തിൽ ചെറുവത്തൂർ ബി.ആർ.സി യു.പി.വിഭാഗം കുട്ടികൾക്കായി കാലിക്കടവ് കരക്കേരു ഫ്രന്റ്സ് ക്ലബ്ബിൽ  സംഘടിപ്പിച്ച ഉപജില്ലാ തല ഖൊ-ഖോ ടൂർണമെന്റിൽ  പെൺകുട്ടികളുടെ വിഭാഗത്തിൽ ഒന്നാം സ്ഥാനവും ആൺകുട്ടികളുടെ വിഭാഗത്തിൽ രണ്ടാം സ്ഥാനവും കരസ്ഥമാക്കി ഓലാട്ട് എ.യു.പി.സ്കൂളിലെ കുരുന്നുകൾ മേളയിലെ താരങ്ങളായി.മികച്ച പ്രകടനത്തിലൂടെ ആൺകുട്ടികളുടെ വിഭാഗത്തിലെ ഒന്നാം സ്ഥാനം വെള്ളച്ചാൽ ജി.എം.ആർ.എസും പെൺകുട്ടികളുടെ വിഭാഗത്തിലെ രണ്ടാം സ്ഥാനം
ഉദിനൂർ സെൻട്രൽ എ.യു.പി.സ്കൂളും കരസ്ഥമാക്കി. ഇരു വിഭാഗങ്ങളിലും 35 ടീമുകളിലായി
420 കുട്ടികളാണ്  യു.പി. കുട്ടികൾക്ക്  ഇദംപ്രഥമമായി നടത്തിയ ഖൊ- ഖൊ ടൂർണമെന്റിൽ പങ്കാളികളായത്.




04 February, 2018

കൈക്കോട്ടുകടവ് സ്കൂൾ ജേതാക്കൾ 03.02.2018


സർവശിക്ഷാ അഭിയാന്റെ ആഭിമുഖ്യത്തിൽ ചെറുവത്തൂർ ബി ആർ സി സംഘടിപ്പിച്ച യു പി വിഭാഗം കുട്ടികൾക്കുള്ള ഉപജില്ലാ തല ഫുട്ബോൾ മേളയിൽ കൈക്കോട്ടുകടവ് പി എം എസ്സ് എ പി ടി എസ് വൊക്കേഷണൽ ഹയർ സെക്കന്ററി സ്‌കൂൾ ജേതാക്കളായി. ഫൈനൽ മത്സരത്തിൽ   ഉദിനൂർ സെൻട്രൽ എ യു പി  സ്കൂളിനെയാണ് ഇവർ കീഴ്പ്പെടുത്തിയത്.പടന്നക്കടപ്പുറം ഗവ. ഫിഷറീസ് ഹയർ സെക്കന്ററി സ്കൂൾ മൈതാനിയിൽ നടന്ന ഫുട്ബോൾ മേളയിൽ ഉപജില്ലാ പരിധിയിലെ 26 വിദ്യാലയങ്ങളിൽ നിന്നുള്ള 338 കുട്ടികൾ അണിനിരന്നു.വലിയപറമ്പ് ഗ്രാമപഞ്ചായത്ത് പ്രസിഡന്റ് എം ടി അബ്ദുൽ ജബ്ബാർ ഉദ്ഘാടനം ചെയ്തു.ഉപജില്ലാ വിദ്യാഭ്യാസ ഓഫീസർ ടി എം സദാനന്ദൻ അധ്യക്ഷനായിരുന്നു. ഇന്ത്യൻ ആർമി ഫുട്‌ബോൾ കോച്ച് കെ ഗണേശൻ മുഖ്യാതിഥിയായിരുന്നു. ബിപിഒ  കെ നാരായണൻ, പടന്നക്കടപ്പുറം ഗവ.ഫിഷറീസ് ഹയർ സെക്കന്ററി സ്കൂൾ പ്രധാനാധ്യാപകൻ എം  ഭാസ്കരൻ ,രാജു നെടുങ്കണ്ടം, കെ അശോകൻ എന്നിവർ സംസാരിച്ചു. വിജയികൾക്ക് എസ് എസ് എ ജില്ലാ പ്രോജക്ട് ഓഫീസർ പി പി വേണുഗോപാലൻ സമ്മാനദാനം നടത്തി.




02 February, 2018

📊ഗണിത ലാബ് ഉദ്ഘാടനം ചെയ്തു⚖- GLPS KAYYUR


         സർവ്വശിക്ഷ അഭിയാന്റെ ആഭിമുഖ്യത്തിൽ ചെറുവത്തൂർ ബി.ആർ.സിയുടെ പിന്തുണയോടെ കയ്യൂർ ഗവ.എൽ.പി.സ്കൂളിൽ സജ്ജീകരിച്ച ഗണിത ലാബിന്റെയും, പൊതു വിദ്യാഭ്യസ സംരക്ഷണ യജ്ഞത്തിന്റെ ഭാഗമായുള്ള രക്ഷാകർതൃവിദ്യാഭ്യാസ പരിപാടിയുടെയും ഉദ്ഘാടനം കയ്യൂർ-ചീമേനി ഗ്രാമപഞ്ചായത്ത് പ്രസിഡണ്ട് ശ്രീമതി കെ. ശകുന്തള നിർവഹിച്ചു.ചെറുവത്തൂർ ബി.പി.ഒ   കെ.നാരായണൻ ആമുഖഭാഷണം നടത്തി. കയ്യൂർ ഗവ.വൊക്കേഷണൽ ഹയർ സെക്കണ്ടറി  സ്കൂൾ അധ്യാപകൻ കെ.അനിൽകുമാർ ക്ലാസ്സ് എടുത്തു. ഗ്രാമ പഞ്ചായത്ത് വിദ്യാഭ്യാസ സ്റ്റാന്റിംഗ് കമ്മറ്റി ചെയർപേഴ്സൺ കെ.രജനി അക്കാദമിക മാസ്റ്റർപ്ലാൻ പ്രകാശനം ചെയ്തു. എൻ.കെ.വിനോദ് കുമാർ മാസ്റ്റർ പ്ലാൻ പരിചയപ്പെടുത്തി. 
                      'നല്ല സമൂഹത്തിനായ് നല്ല വായന' എന്ന വിഷയത്തിൽ ബി.ആർ.സി.സംഘടിപ്പിച്ച പ്രബന്ധരചനാ മത്സരത്തിലെ സ്കൂൾതല വിജയികൾക്ക് വാർഡ് മെമ്പർ പി.പി.മോഹനൻ സമ്മാനങ്ങൾ വിതരണം ചെയ്തു.  കെ.വി. പ്രമീള ടീച്ചർ വിദ്യാലയ മികവുകളും പരിമിതികളും രക്ഷിതാക്കളുടെ ചർച്ചയ്ക്കായി അവതരിപ്പിച്ചു. പി.ടി.എ പ്രസിഡണ്ട് കെ.രാജൻ അധ്യക്ഷത വഹിച്ച ചടങ്ങിൽ പ്രഥമാധ്യാപിക സി.പങ്കജാക്ഷി സ്വാഗതവും എം.പി.ടി.എ.പ്രസിഡണ്ട് കെ.വി. പ്രസീന നന്ദിയും പറഞ്ഞു.

ഭിന്നശേഷിക്കാരായ കുരുന്നുകളുടെ പഠനയാത്ര 02.02.2018


       ലോക തണ്ണീർത്തട ദിനത്തിൽ കായലിൽ കണ്ടലുകൾ വെച്ചുപിടിപ്പിച്ച് ഭിന്നശേഷിക്കാരായ കുരുന്നുകളുടെ പഠനയാത്രയ്ക്ക് ഗംഭീര തുടക്കം. സർവശിക്ഷാ അഭിയാൻ ചെറുവത്തൂർ ബി ആർ സി യുടെ ആഭിമുഖ്യത്തിലാണ് ഉപജില്ലാ പരിധിയിലെ ശാരീരിക മാനസിക പ്രയാസങ്ങൾ അനുഭവിക്കുന്ന കുട്ടികൾക്ക് പഠനയാത്ര സംഘടിപ്പിച്ചത്.
         ലോക തണ്ണീർത്തട ദിനത്തിന്റെ സന്ദേശമുൾക്കൊണ്ട് കവ്വായിക്കായലിൽ ഇടയിലെക്കാട് ബണ്ടിനടുത്ത് അമ്പതോളം കണ്ടലുകൾ വെച്ചുപിടിപ്പിച്ചും ദിന സന്ദേശം കുട്ടികളിലേക്ക് പകർന്നുമായിരുന്നു  യാത്രയ്ക്ക് തുടക്കം കുറിച്ചത്.  ഇടയിലെക്കാട് എ എൽ പി സ്കൂളിലെ കുട്ടികൾ നാടിനെ അറിയാനെത്തിയ കൂട്ടുകാർക്ക് കണ്ടൽ തൈകൾ കൈമാറി വരവേറ്റു. ഇടയിലെക്കാട് കാവിന്റെ വനഭംഗി ആസ്വദിച്ചും കാവിലെ വാനരപ്പടയ്ക്ക് നിത്യവും ചോറൂട്ടുന്ന മാണിക്കമ്മയോട് അനുഭവങ്ങൾ ചോദിച്ചറിഞ്ഞും ജൈവ വൈവിധ്യത്തെ തൊട്ടറിഞ്ഞും തുടങ്ങിയ യാത്ര തീരദേശത്തിന്റെ പരിസ്ഥിതിയെ നേരിട്ടറിഞ്ഞ് ചെമ്പല്ലിക്കുണ്ട് വയലപ്ര വരെ നീണ്ടു. 20 കുട്ടികളും അവരുടെ രക്ഷിതാക്കളുമായിരുന്നു യാത്രയിൽ പങ്കാളികളായത്.ബിആർസിയുടെ ആഭിമുഖ്യത്തിൽ നടത്തിയ ദ്വിദിന സഹവാസ ക്യാമ്പായ വിസ്മയക്കൂടാരത്തിന്റെ ഭാഗമായാണ് യാത്ര ഒരുക്കിയത്. ഇടയിലെക്കാട് എ എൽ പി സ്കൂൾ പ്രധാനാധ്യാപകൻ എ അനിൽകുമാർ തണ്ണീർത്തട ദിന സന്ദേശം നൽകി.പി വേണുഗോപാലൻ, പി സ്നേഹലത, പി വി പ്രസീദ, സി വി ലേഖ, പി പ്രമോദ് എന്നിവർ സംസാരിച്ചു.

22 January, 2018

കബഡി ഫെസ്റ്റ് - ജി.യു.പി.എസ് മുഴക്കോം 20.൦1.2018

യു പി വിഭാഗം വിദ്യാർഥികൾക്കായി ചെറുവത്തൂർ ബി ആർ സി സംഘടിപ്പിച്ച കബഡി ഫെസ്റ്റ് ഗെയിംസ് രംഗത്ത് പുതിയ ചുവടുവയ്പായി. സർവശിക്ഷാ അഭിയാൻ നിയമിച്ച സ്പെഷലിസ്റ്റ് അധ്യാപകർ വിവിധ മാറി  സ്കൂളുകളിൽ നടത്തുന്ന കായികപരിശീലന മികവിന്റെ നേർ ഷങ്ങളായി കബഡി മേള .കബഡി ചാമ്പ്യൻഷിപ്പ് ചെറുവത്തൂർ ഉപജില്ലാ വിദ്യാഭ്യാസ ഓഫീസർ ടി എം സദാനന്ദൻ ഉദ്ഘാടനം ചെയ്തു.
        ആൺകുട്ടികളുടെ 21 ഉം പെൺകുട്ടികളുടെ 16 ടീമുകളിലുമായി 444 പേരാണ് മത്സരത്തിൽ മാറ്റുരയ്ക്കാനെത്തിയത്. ചെറുവത്തൂർ ബി ആർ സി യിലെ സ്പെഷലിസ്റ്റ് അധ്യാപകർക്കൊപ്പം ജില്ലയിലെ മറ്റ് ബിആർസികളിലെ കായികാധ്യാപകരും റഫറിമാരായെത്തി.പൊതു വിദ്യാലയങ്ങളുടെ സർവ രംഗങ്ങളിലുമുള്ള പുരോഗതി ലക്ഷ്യമിട്ട് പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി യു പി വിഭാഗങ്ങളുള്ള വിദ്യാലയങ്ങളിൽ സ്പെഷലിസ്റ്റ് കായികാധ്യാപകരെ സർക്കാർ നിയമിച്ചതോടെ അത്തരം സ്കൂളുകളിലെ കായികരംഗം ഇന്ന് സജീവമാണ്. എന്നാൽ യു പി വിഭാഗം കുട്ടികൾക്ക് ഉപജില്ലാ ഗെയിംസുകളിൽ പങ്കെടുക്കാൻ അവസരമില്ല. ഇത് മറികടക്കുന്നതിനു വേണ്ടിയാണ് ചെറുവത്തൂരിൽ ബി ആർ സി തലത്തിൽ ഇദംപ്രഥമമായി ഗെയിംസ് മേള നടത്തുന്നത്.ഫെബ്രുവരി 3ന് പടന്നക്കടപ്പുറം ഗവ. ഫിഷറീസ് ഹയർ സെക്കന്ററി സ്കൂളിൽ ഫുട്ബോൾ മേളയും 10 ന് കാലിക്കടവിൽ ഖൊ  ഖൊ മേളയും നടക്കും.
       ഉദ്ഘാടന ചടങ്ങിൽ കയ്യൂർ ചീമേനി ഗ്രാമപഞ്ചായത്ത് മെമ്പർ കെ പ്രമിത അധ്യക്ഷയായിരുന്നു. ബിപിഒ  കെ നാരായണൻ, എം രാജു, കെ പി രവീന്ദ്രൻ ,പി ബാബു, പ്രധാനാധ്യാപകൻ പി വി രമേശൻ സ്വാഗതവും കെ വി ബാബു നന്ദിയും പറഞ്ഞു. ആൺ കുട്ടികളുടെ വിഭാഗത്തിൽ കൊവ്വൽ എ യു പി       സ്കൂളും പെൺകുട്ടികളുടെ വിഭാഗത്തിൽ അച്ചാംതുരുത്തി രാജാസ്സ് എയുപി സ്‌കൂളും ജേതാക്കളായി. യഥാക്രമം കുട്ടമത്ത് ഗവ.ഹയർ സെക്കന്ററി  സ്കൂളും     സ്കൂളും കൊവ്വൽ എ യു പി സ്കൂളുംരണ്ടാം സ്ഥാനം കരസ്ഥമാക്കി.മികച്ചറൈഡർമാരായി അനീഷ് (കുട്ടമത്ത് ), ശ്രേയ (കൊവ്വൽ), മികച്ച ക്യാച്ചർമാരായി പ്രണവ് (കൊവ്വൽ) നന്ദിത (അച്ചാംതുരുത്തി) എന്നിവരെ തെരഞ്ഞെടുത്തു.വിജയികൾക്ക്   കയ്യൂർ ചീമേനി ഗ്രാമപഞ്ചായത്ത് വൈസ് പ്രസിഡന്റ്  കെ  വി ഗംഗാധരൻ സമ്മാനദാനം നടത്തി.





20 January, 2018

ട്വിന്നിംഗ് പ്രോഗ്രാം

വിദ്യാലയ മികവുകൾ പരസ്പരം പങ്കുവയ്ക്കുന്നതിനും മികച്ച മാതൃകകൾ സ്വന്തം വിദ്യാലയത്തിൽ പ്രാവർത്തികമാക്കുന്നതിനും ലക്ഷ്യമിട്ട് സർവശിക്ഷാ അഭിയാൻ ആവിഷ്ക്കരിച്ച    സ്കൂൾ ട്വിന്നിംഗ് പ്രോഗ്രാമിന് ചെറുവത്തൂർ ബി ആർ സി യിൽ തുടക്കമായി.ഉദിനൂർ സെൻട്രൽ എ യു പി സ്കൂളിൽ അതിഥികളായെത്തിയ മുഴക്കോം ജിയുപി സ്കൂളിലെ ഏഴാം തരത്തിലെ മുപ്പത് വിദ്യാർഥികളും പ്രഥമാധ്യാപകനുൾപ്പെടെ നാല് അധ്യാപകരുമാണ് വേറിട്ട പരിപാടിയിൽ പങ്കാളികളായത്.
        രാവിലെ സ്‌കൂൾ അസംബ്ലിയിൽ പടന്ന ഗ്രാമ പഞ്ചായത്ത് മെമ്പർ ഒ ബീനയും ഒന്നാം തരത്തിലെ കുട്ടികളും ചേർന്ന് അതിഥികളായ കുട്ടികൾക്ക് പുസ്തകങ്ങൾ സമ്മാനിച്ചുകൊണ്ട് പരിപാടിയുടെ ഉദ്ഘാടനം നിർവഹിച്ചു. മലയാളം, ഇംഗ്ലീഷ്, ഹിന്ദി, സംസ്കൃതം, ഉറുദു വാർത്താ വായനകളും പുസ്തകാസ്വാദനക്കുറിപ്പ് അവതരണവും അസംബ്ലിയെ ശ്രദ്ധേയമാക്കി. തുടർന്ന് ഐ സി ടി സാധ്യതകൾ ഉപയോഗപ്പെടുത്തി ഏഴാം തരത്തിൽ വിവിധ വിഷയങ്ങൾ എളുപ്പത്തിൽ ഗ്രഹിക്കാൻ പറ്റും വിധത്തിൽ അധ്യാപകർ അവതരിപ്പിച്ചു.ഉദിനൂരിന്റെ മികവുകളിലൊന്നായ പ്രതിമാസ മാധ്യമ ക്വിസ് മത്സരത്തിൽ മുഴക്കോത്തെ കുട്ടികളും സമ്മാനം നേടി.ഉദിനൂർ സെൻട്രലിൽ 2017-18 അധ്യയന വർഷം നടന്ന മികവുകളുടെ ഡോക്യുമെന്ററി, ഫോട്ടോ പ്രദർശനമായിരുന്നു പിന്നീട്.ബാലസഭ, സാഹിത്യ സമാജം,ശലഭോദ്യാനം, പച്ചക്കറിത്തോട്ടം സന്ദർശനം എന്നിവയും മികവുകളുടെ നേർസാക്ഷ്യങ്ങളായി മുഴക്കോത്തെ കുട്ടികൾ കണ്ടറിഞ്ഞു. അടുത്ത മാസം ആദ്യം ഉദിനൂരിലെ പുതിയ കൂട്ടുകാരെ തങ്ങളുടെ വിദ്യാലയത്തിലേക്ക് ക്ഷണിച്ചു കൊണ്ടാണ് മുഴക്കോത്തെ കുരുന്നുകൾ മടങ്ങിയത്.
     ഉദ്ഘാടന ചടങ്ങിൽ ബിപിഒ  കെ നാരായണൻ പരിപാടി വിശദീകരണം നടത്തി.ഉദിനൂർ സെൻട്രൽ എ യു പി സ്കൂൾ പ്രഥമാധ്യാപിക വി ചന്ദ്രിക, മുഴക്കോം  ജിയുപി സ്കൂൾ പ്രഥമാധ്യാപകൻ പി വി രമേശൻ, അധ്യാപകരായ ബിജു, ദ്രൗപദി, അജിത, മദർ പി ടി എ പ്രസിഡന്റ് ഉഷാ കൃഷ്ണൻ, ബി ആർ സി പരിശീലകരായ പി വി ഉണ്ണിരാജൻ ,പി വേണുഗോപാലൻ എന്നിവർ സംസാരിച്ചു.

*ക്ലാസ്സ് ലൈബ്രറികളിലൂടെ പുതിയ വായനാ സംസ്കാരത്തിലേക്ക്*

               *ക്ലാസ്സ് ലൈബ്രറികളിലൂടെ പുതിയ വായനാ സംസ്കാരത്തിലേക്ക്* 
..........................................ക്ലാസ് ലൈബ്രറികളിലൂടെ പുതിയ വായനാ സംസ്കാരം കെട്ടിപ്പടുക്കാനുള്ള യത്നത്തിന്റെ ഭാഗമായി സംഘടിപ്പിക്കപ്പെട്ട വായനാ സെമിനാർ പുതിയ കാലത്തെ കുഞ്ഞു വായനയെ പരിപോഷിപ്പിക്കാനുള്ള സമ്പന്നമായ ചുവടുവയ്പായി. സർവശിക്ഷാ അഭിയാൻ ചെറുവത്തൂർ ബി ആർ സി യുടെ ആഭിമുഖ്യത്തിൽ കരക്കേരു ഫ്രന്റ്സ് ക്ലബ്ബ് ഓഡിറ്റോറിയത്തിൽ  നടത്തിയ ഏകദിന സെമിനാറും മലയാളത്തിളക്കം  പദ്ധതിയുടെ ഉപജില്ലാതല വിജയപ്രഖ്യാപനവുമാണ് രക്ഷിതാക്കളുടെയും ജനപ്രതിനിധികളുടെയും അധ്യാപകരുടെയും സജീവമായ ഇടപെടലിലൂടെ ശ്രദ്ധേയമായത്.
      'നല്ല വായന
      നല്ല പoനം 
      നല്ല ജീവിതം'
ക്യാമ്പെയിനിന്റെ ഭാഗമായി  ബിആർസിയുടെ നേതൃത്വത്തിൽ നടന്ന പുസ്തകയാത്ര, അമ്മ വായന കുഞ്ഞു വായന, കുട്ടികളുടെ വായനാ കുറിപ്പുകളുടെ പതിപ്പ്, മലയാളത്തിളക്കം അനുഭവത്തിന്റെ പശ്ചാത്തലത്തിൽ തയ്യാറാക്കപ്പെട്ട കുട്ടികളുടെ രചനകൾ ,രക്ഷിതാക്കളുടെ പ്രബന്ധരചനാ മത്സരം എന്നിവയുടെ തുടർച്ചയായാണ് സെമിനാർ ഒരുക്കപ്പെട്ടത്.
എം രാജഗോപാലൻ 
എം എൽഎ സെമിനാറിന്റെ ഉദ്ഘാടനവും ബി ആർ സി വാർത്താപത്രികയായ 'നേർവഴി'യുടെ പ്രകാശനവും നിർവഹിച്ചു.ഉപജില്ലാ വിദ്യാഭ്യാസ ഓഫീസർ
 ടി എം സദാനന്ദൻ അധ്യക്ഷനായിരുന്നു.
മലയാളത്തിളക്കം ഉപജില്ലാതല വിജയപ്രഖ്യാപനം എസ് എസ് എ ജില്ലാ പ്രോജക്ട് ഓഫീസർ
 പി പി വേണുഗോപാലൻ നിർവഹിച്ചു.ബി ആർ സി പരിശീലകൻ പി വി ഉണ്ണിരാജൻ മലയാളത്തിളക്കം റിപ്പോർട്ടവതരിപ്പിച്ചു. വായനാ കുറിപ്പുകളുടെ പ്രകാശനം പിലിക്കോട് ഗ്രാമപഞ്ചായത്ത് പ്രസിഡന്റ് ടി വി ശ്രീധരൻ നിർവഹിച്ചു. രക്ഷിതാക്കൾക്കുള്ള പ്രബന്ധരചനാ മത്സര വിജയികൾക്ക് ഹൊസ്ദുർഗ് താലൂക്ക് ലൈബ്രറി കൗൺസിൽ സെക്രട്ടറി ടി രാജൻ സമ്മാനദാനം നടത്തി. സെമിനാറിൽ ഡയറ്റ് സീനിയർ ലക്ചറർ കെ രാമചന്ദ്രൻ നായർ മോഡറേറ്ററായിരുന്നു. കേരള സാഹിത്യ അക്കാദമി മെമ്പർ ടി പി വേണുഗോപാലൻ (നല്ല പ ഠനത്തിനായ് കുഞ്ഞുവായന), 
എസ് എസ് എ
 ജില്ലാ പ്രോഗ്രാം ഓഫീസർ ഡോ.എം വി ഗംഗാധരൻ ( വായനാ ക്കളരിക്കായ് ക്ലാസ് ലൈബ്രറികൾ) എന്നിവർ വിഷയാവതരണം നടത്തി.
     രക്ഷിതാക്കൾക്കുള്ള പ്രബന്ധരചനാ മത്സരത്തിൽ ഒന്നാം സ്ഥാനം നേടിയ പി കെ രമയുടെ പ്രബന്ധാവതരണം, മലയാളത്തിളക്കം നേടിയ ഉദിനൂർ സെൻട്രൽ എ യു പി സ്കൂളിലെ നിവേദ്യയുടെ കഥാവതരണം എന്നിവയും ശ്രദ്ധേയമായി.
തുടർന്ന് 
അക്കാദമിക് മാസ്റ്റർ പ്ലാനും രക്ഷാകർതൃവിദ്യാഭ്യാസവും വിഷയത്തിൽ നടന്ന ചർച്ചാ ക്ലാസ് ഡയറ്റ് സീനിയർ ലക്ചറർ 
ടി വി ഗോപകുമാർ നയിച്ചു.ബി പി ഒ  
കെ നാരായണൻ സ്വാഗതവും 
ബി ആർ സി പരിശീലകൻ പി വേണുഗോപാലൻ നന്ദിയും പറഞ്ഞു.

 *_രക്ഷിതാക്കൾക്കുള്ള പ്രബന്ധരചനാ മത്സര വിജയികൾ :_* 
( ഒന്നും രണ്ടും മൂന്നും സ്ഥാനക്രമത്തിൽ)

 പി കെ രമ ( എ എൽ പി സ്കൂൾ കാരിയിൽ)

പി പി ജയശ്രീ ( എ യു പി സ്കൂൾ ഉദിനൂർ സെൻട്രൽ)

കെ ആശ ( എ യു പി സ്കൂൾ ഓലാട്ട്)


12 December, 2017

'ഒന്നിച്ചൊന്നായ്... ഞങ്ങളും നിങ്ങളോടൊപ്പം'

സർവ്വശിക്ഷാ അഭിയാന്റെ ആഭിമുഖ്യത്തിൽ ഡിസമ്പർ 1 മുതൽ 7വരെ നടന്ന ഭിന്നശേഷി വാരാചരണത്തിന്റെ ജില്ലാതല സമാപനം ചെറുവത്തൂർ ബി.ആർ.സിയിലെ കരക്കേരു ഫ്രന്റ്സ് ക്ലബ്ബിൽ നടന്നു. ഉപജില്ലയിലെ വിവിധ വിദ്യാലയങ്ങളിൽ നിന്നായി 60 കുട്ടികളും അവരുടെ രക്ഷിതാക്കളും, ബി.ആർ.സി പ്രവർത്തകരും ഉൾപ്പെടെ 150 പേർ പങ്കെടുത്ത 'ഒന്നിച്ചൊന്നായ്... ഞങ്ങളും
 നിങ്ങളോടൊപ്പം'
പരിപാടി പിലിക്കോട് ഗ്രാമപഞ്ചായത്ത് പ്രസിഡണ്ട് ടി.വി.ശ്രീധരൻ മാസ്റ്റർ ഉദ്ഘാടനം ചെയ്തു.ടി.വി. ഷോയിൽ നാടൻ പാട്ടുകൾ അവതരിപ്പിച്ച് പ്രേക്ഷകരുടെ മനം കവർന്ന മാടക്കാൽ ഗവ.എൽ.പി.സ്കൂളിലെ ഗോകുൽ രാജിനുള്ള ബി.ആർ.സിയുടെ ഉപഹാരം ഉപജില്ലാ വിദ്യാഭ്യാസ ഓഫീസർ ടി.എം.സദാനന്ദൻ വിതരണം ചെയ്തു.ചെറുവത്തൂർ 
ബി.പി ഒ  കെ.നാരായണൻ
ചടങ്ങിൽ അധ്യക്ഷത വഹിച്ചു. പിലിക്കോട് ഗവ: ഹൈസ്കൂൾ പ്രഥമാധ്യാപകൻ എൻ.നാരായണൻ ആശംസയർപ്പിച്ച് സംസാരിച്ചു.പി വി.ഉണ്ണി രാജൻ സ്വാഗതവും 
പി.വി.പ്രസീദ നന്ദിയും പറഞ്ഞു.
തുടർന്ന്  നടന്ന കലാപരിപാടികളിലും കായിക മത്സരങ്ങളിലും കുട്ടികൾ ആവേശപൂർവം പങ്കെടുത്തു.
  വൈകുന്നേരം പിലിക്കോട്ടെ ദീക്ഷിത് ദി ഗേഷും രക്ഷിതാക്കളും ചേർന്ന്  കൊളുത്തിയ ദീപശിഖ ബി.ആർ.സിയിലെ സ്പെഷ്യലിസ്റ്റ് അധ്യാപകരും പിലിക്കോട്  ഗവ: ഹൈസ്കൂളിലെ  സ്കൗട്ട് ട്രൂപ്പും ചേർന്ന് റാലിയായി വേദിയിൽ എത്തിച്ചു. 'ഞങ്ങളും നിങ്ങളോടൊപ്പം ' എന്ന പ്രതിജ്ഞ ചൊല്ലി ഭിന്നശേഷി ക്കാരായ കുട്ടികൾക്കും രക്ഷിതാക്കൾക്കും ഐക്യദാർഢ്യം പ്രഖ്യാപിച്ചാണ് പരിപാടി അവസാനിച്ചത്. സമാപനയോഗത്തിൽ എസ്.എസ്.എ ജില്ലാ പ്രോഗ്രാം ഓഫീസർ ബി.ഗംഗാധരൻ മുഴുവൻ കുട്ടികൾക്കും സമ്മാനങ്ങൾ വിതരണം ചെയ്തു. സി.വി. ലേഖ സ്വാഗതവും പി.കെ സരോജിനി നന്ദിയും പറഞ്ഞു.

20 October, 2017

സ്വാതന്ത്ര്യ സമര ചരിത്രാന്വേഷണ യാത്ര

ബി.ആർ.സി ചെറുവത്തൂർ സ്വാതന്ത്ര്യ സമര ചരിത്രാന്വേഷണ യാത്ര ഉപജില്ലാതല
ചരിത്രോത്സവം 18.10.2017 ന് ചന്തേര ഗവ: യു പി.സ്കൂളിൽ എം.രാജഗോപാലൻ എം.എൽ.എഉദ്ഘാടനം ചെയ്തു. ഉപജില്ലാ വിദ്യാഭ്യസ ഓഫീസർ ടി.എം.സദാനന്ദൻ അധ്യക്ഷനായിരുന്നു . എസ്.എസ്.എ ജില്ലാ പ്രോഗ്രാം ഓഫീസർ ഡോ: എം.വി.ഗംഗാധരൻ, സാമൂഹ്യ ശാസ്ത്ര ക്ലബ്ബ് അസോസിയേഷൻ സംസ്ഥാന ജോ: സെക്രട്ടറി അബ്ദുൾ ബഷീർ, ചന്തേര ഗവ: യു.പി.സ്കൂൾ പ്രഥമാധ്യാപകൻ ടി.വി.ബാലകൃഷ്ണൻ എന്നിവർ ആശംസകളർപ്പിച്ച് സംസാരിച്ചു. ബി.പി.ഒ കെ.നാരായണൻ സ്വാഗതവും ബി.ആർ.സി.ട്രെയിനർ പി.വി.ഉണ്ണി രാജൻ നന്ദിയും പറഞ്ഞു.
  തുടർന്ന് നടന്ന ചരിത്ര സെമിനാറിൽ എസ്.എസ്.എ ജില്ലാ പ്രൊജക്ട് ഓഫീസർ പി.പി.വേണുഗോപാലൻ മോഡറേറ്ററായി. പയ്യന്നൂർ കുഞ്ഞിരാമൻ മുഖ്യ വിഷയാവതരണം നടത്തി. വിദ്യാർഥിനികളായ തീർഥ ബാബു, വിസ്മയ വിരാജ്, ആദിത്യ രവീന്ദ്രൻ, ടി.പി. നിവേദ്യ എന്നിവർഉപ അവതരണങ്ങൾ നടത്തി . അധ്യാപകരുടെയും രക്ഷിതാക്കളുടെയും പ്രതികരണങ്ങൾക്കു ശേഷം മോഡറേറ്റർ ക്രോഡീകരണം  നടത്തി.ബി.ആർ.സി ട്രെയിനർ പി.കെ.സരോജിനി നന്ദി പറഞ്ഞു.
  ഉച്ചയ്ക്കു ശേഷം നടന്ന മൾട്ടിമീഡിയ മെഗാ ക്വിസിൽ ആറ് റൗണ്ട് ചോദ്യങ്ങൾ 6 പേർ അവതരിപ്പിച്ചത് പങ്കാളികൾക്കും പ്രേക്ഷകർക്കും പുതുമയാർന്ന അനുഭവമായി. സാമൂഹ്യ - സാംസ്കാരിക -വിദ്യാഭ്യാസ  പ്രവർത്തകരായ സി.എം.വിനയചന്ദ്രൻ, വാസു ചോറോട്, കെ.ശശിധരൻ അടിയോടി കൃഷ്ണദാസ് പലേരി, പി.വേണുഗോപാലൻ,
പി.വി.ഉണ്ണി രാജൻ എന്നിവരായിരുന്നു ക്വിസ് നയിച്ചത്.
       സമാപന യോഗത്തിൽ കെ.ശശിധരൻ അടിയോടി അധ്യക്ഷത വഹിച്ചു. പിലിക്കോട് ഗ്രാമപഞ്ചായത്ത് പ്രസിഡണ്ട് ടി.വി.ശ്രീധരൻ മാസ്റ്റർ മത്സര വിജയികൾക്ക് സമ്മാന പുസ്തകങ്ങളും കേഷ് അവാർഡും വിതരണം ചെയ്തു. ഒപ്പം ചരിത്രോത്സവത്തിൽ പങ്കെടുത്ത മുഴുവൻ കുട്ടികൾക്കും സർട്ടിഫിക്കറ്റും നൽകി. പി.സ്നേഹലത സ്വാഗതവും പി.വി.പ്രസീദ നന്ദിയും പറഞ്ഞു.

 ചരിത്രോത്സവ വിജയികൾ


LP വിഭാഗം:

1. അശ്വന്ത് .കെ .വി (KKNM AUPS ഓലാട്ട് )
2. ശ്രേയസ് (AUPS ആലന്തട്ട )

UP വിഭാഗം:

1. ആദിത്യ രവീന്ദ്രൻ ( GVHSS കയ്യൂർ)
2. നന്ദന .എം (GWUPS കൊടക്കാട്)

HSവിഭാഗം:

1. മാളവിക ( GHSS പിലിക്കോട്)
2. ആദിത്ത് രാജ് ( GHSS സൗത്ത് തൃക്കരിപ്പൂർ)
ഏറ്റവും മികച്ച സ്വാതന്ത്ര്യ സമര ചരിത്രപ്പതിന് പ്രത്യേക സമ്മാനം നേടിയത്:

ടി.പി. നിവേദ്യ (GLPS വൾവക്കാട്

07 September, 2017

ചെറുവത്തൂർ ബി.ആർ.സി. കുടുംബാംഗങ്ങളുടെ ഓണാഘോഷം 02.09.2017



ഭിന്നശേഷിക്കാരായ കുട്ടികൾക്കൊപ്പം ചെറുവത്തൂർ ബി.ആർ.സി. കുടുംബാംഗങ്ങളുടെ ഓണാഘോഷം -
" വാ പൂവേ ....പൊലി പൂവേ " - ശ്രദ്ധേയമായി.


നാടൻ പൂക്കളുടെ പ്രദർശനത്തോടെയായിരുന്നു തുടക്കം..ഒപ്പം സപെഷ്യലിസ്റ്റ് അധ്യാപികമാർ നേതൃത്വം നൽകിയ ഓണപ്പാട്ടിന്റെ അകമ്പടിയോടെ എല്ലാവരും ചേർന്ന് നാടൻ പൂക്കൾ മത്രം ഉപയോഗിച്ച് സ്നേഹപ്പൂക്കളം തീർത്തു.എസ്.എസ്.എ ജില്ലാ പ്രോഗ്രാം ഓഫീസർ ഡോ: എം.വി.ഗംഗാധരൻ പരിപാടി ഉദ്ഘാടനം ചെയ്തു. കുട്ടികൾക്കും, രക്ഷിതാക്കൾക്കും, ബി.ആർ.സി സ്റ്റാഫ് അംഗങ്ങൾക്കുമായി വൈവിധ്യമാർന്ന മത്സരങ്ങളും സംഘടിപ്പിച്ചു. ശ്രീ.
എം. രാജഗോപാലൻ എം.എൽ.എ കുട്ടികൾക്ക് ഓണക്കോടി വിതരണം ചെയ്തു.തൃക്കരിപ്പൂർ ഗ്രാമപഞ്ചായത്ത് പ്രസിഡണ്ട് വി.പി.ഫൗസിയ മത്സരവിജയികൾക്കുള്ള സമ്മാനദാനം നിർവഹിച്ചു. ബ്ലോക്ക് പ്രോഗ്രാം ഓഫീസർ കെ.നാരായണൻ ചടങ്ങിൽ അധ്യക്ഷത വഹിച്ചു.ബി.ആർ.സി ട്രെയിനർ പി.വി.ഉണ്ണിരാജൻ സ്വാഗതവും പി.വേണുഗോപലൻ നന്ദിയും പറഞ്ഞു. ട്രെയിനർമാരായ പി.കെ.സരോജിനി, സ്നേഹലത, ഐ.. ഇ.ഡി.സി. റിസോഴ്‌സ് അധ്യാപികമാരായ പ്രസീദ ,ലേഖ എന്നിവർക്കൊപ്പം , ഓഫീസ് ജീവനക്കാരും, എസ്.എസ്.എ നിയമിച്ച കലാ-കായിക - പ്രവൃത്തി പഠന അധ്യാപകരും പരിപാടിക്ക് നേതൃത്വം നൽകി. ഉച്ചയ്ക്ക് വിഭവസമൃദ്ധമായ ഓണസദ്യയും ഒരുക്കിയിരുന്നു. പരിപാടിക്കിടെ എം.എൽ.എ.യും മാവേലിയും കണ്ടുമുട്ടിയതും, ഇവരുടെ സൗഹൃദ സംഭാഷണവും കൗതുകക്കാഴ്ചയായി.