12 December, 2017

'ഒന്നിച്ചൊന്നായ്... ഞങ്ങളും നിങ്ങളോടൊപ്പം'

സർവ്വശിക്ഷാ അഭിയാന്റെ ആഭിമുഖ്യത്തിൽ ഡിസമ്പർ 1 മുതൽ 7വരെ നടന്ന ഭിന്നശേഷി വാരാചരണത്തിന്റെ ജില്ലാതല സമാപനം ചെറുവത്തൂർ ബി.ആർ.സിയിലെ കരക്കേരു ഫ്രന്റ്സ് ക്ലബ്ബിൽ നടന്നു. ഉപജില്ലയിലെ വിവിധ വിദ്യാലയങ്ങളിൽ നിന്നായി 60 കുട്ടികളും അവരുടെ രക്ഷിതാക്കളും, ബി.ആർ.സി പ്രവർത്തകരും ഉൾപ്പെടെ 150 പേർ പങ്കെടുത്ത 'ഒന്നിച്ചൊന്നായ്... ഞങ്ങളും
 നിങ്ങളോടൊപ്പം'
പരിപാടി പിലിക്കോട് ഗ്രാമപഞ്ചായത്ത് പ്രസിഡണ്ട് ടി.വി.ശ്രീധരൻ മാസ്റ്റർ ഉദ്ഘാടനം ചെയ്തു.ടി.വി. ഷോയിൽ നാടൻ പാട്ടുകൾ അവതരിപ്പിച്ച് പ്രേക്ഷകരുടെ മനം കവർന്ന മാടക്കാൽ ഗവ.എൽ.പി.സ്കൂളിലെ ഗോകുൽ രാജിനുള്ള ബി.ആർ.സിയുടെ ഉപഹാരം ഉപജില്ലാ വിദ്യാഭ്യാസ ഓഫീസർ ടി.എം.സദാനന്ദൻ വിതരണം ചെയ്തു.ചെറുവത്തൂർ 
ബി.പി ഒ  കെ.നാരായണൻ
ചടങ്ങിൽ അധ്യക്ഷത വഹിച്ചു. പിലിക്കോട് ഗവ: ഹൈസ്കൂൾ പ്രഥമാധ്യാപകൻ എൻ.നാരായണൻ ആശംസയർപ്പിച്ച് സംസാരിച്ചു.പി വി.ഉണ്ണി രാജൻ സ്വാഗതവും 
പി.വി.പ്രസീദ നന്ദിയും പറഞ്ഞു.
തുടർന്ന്  നടന്ന കലാപരിപാടികളിലും കായിക മത്സരങ്ങളിലും കുട്ടികൾ ആവേശപൂർവം പങ്കെടുത്തു.
  വൈകുന്നേരം പിലിക്കോട്ടെ ദീക്ഷിത് ദി ഗേഷും രക്ഷിതാക്കളും ചേർന്ന്  കൊളുത്തിയ ദീപശിഖ ബി.ആർ.സിയിലെ സ്പെഷ്യലിസ്റ്റ് അധ്യാപകരും പിലിക്കോട്  ഗവ: ഹൈസ്കൂളിലെ  സ്കൗട്ട് ട്രൂപ്പും ചേർന്ന് റാലിയായി വേദിയിൽ എത്തിച്ചു. 'ഞങ്ങളും നിങ്ങളോടൊപ്പം ' എന്ന പ്രതിജ്ഞ ചൊല്ലി ഭിന്നശേഷി ക്കാരായ കുട്ടികൾക്കും രക്ഷിതാക്കൾക്കും ഐക്യദാർഢ്യം പ്രഖ്യാപിച്ചാണ് പരിപാടി അവസാനിച്ചത്. സമാപനയോഗത്തിൽ എസ്.എസ്.എ ജില്ലാ പ്രോഗ്രാം ഓഫീസർ ബി.ഗംഗാധരൻ മുഴുവൻ കുട്ടികൾക്കും സമ്മാനങ്ങൾ വിതരണം ചെയ്തു. സി.വി. ലേഖ സ്വാഗതവും പി.കെ സരോജിനി നന്ദിയും പറഞ്ഞു.

20 October, 2017

സ്വാതന്ത്ര്യ സമര ചരിത്രാന്വേഷണ യാത്ര

ബി.ആർ.സി ചെറുവത്തൂർ സ്വാതന്ത്ര്യ സമര ചരിത്രാന്വേഷണ യാത്ര ഉപജില്ലാതല
ചരിത്രോത്സവം 18.10.2017 ന് ചന്തേര ഗവ: യു പി.സ്കൂളിൽ എം.രാജഗോപാലൻ എം.എൽ.എഉദ്ഘാടനം ചെയ്തു. ഉപജില്ലാ വിദ്യാഭ്യസ ഓഫീസർ ടി.എം.സദാനന്ദൻ അധ്യക്ഷനായിരുന്നു . എസ്.എസ്.എ ജില്ലാ പ്രോഗ്രാം ഓഫീസർ ഡോ: എം.വി.ഗംഗാധരൻ, സാമൂഹ്യ ശാസ്ത്ര ക്ലബ്ബ് അസോസിയേഷൻ സംസ്ഥാന ജോ: സെക്രട്ടറി അബ്ദുൾ ബഷീർ, ചന്തേര ഗവ: യു.പി.സ്കൂൾ പ്രഥമാധ്യാപകൻ ടി.വി.ബാലകൃഷ്ണൻ എന്നിവർ ആശംസകളർപ്പിച്ച് സംസാരിച്ചു. ബി.പി.ഒ കെ.നാരായണൻ സ്വാഗതവും ബി.ആർ.സി.ട്രെയിനർ പി.വി.ഉണ്ണി രാജൻ നന്ദിയും പറഞ്ഞു.
  തുടർന്ന് നടന്ന ചരിത്ര സെമിനാറിൽ എസ്.എസ്.എ ജില്ലാ പ്രൊജക്ട് ഓഫീസർ പി.പി.വേണുഗോപാലൻ മോഡറേറ്ററായി. പയ്യന്നൂർ കുഞ്ഞിരാമൻ മുഖ്യ വിഷയാവതരണം നടത്തി. വിദ്യാർഥിനികളായ തീർഥ ബാബു, വിസ്മയ വിരാജ്, ആദിത്യ രവീന്ദ്രൻ, ടി.പി. നിവേദ്യ എന്നിവർഉപ അവതരണങ്ങൾ നടത്തി . അധ്യാപകരുടെയും രക്ഷിതാക്കളുടെയും പ്രതികരണങ്ങൾക്കു ശേഷം മോഡറേറ്റർ ക്രോഡീകരണം  നടത്തി.ബി.ആർ.സി ട്രെയിനർ പി.കെ.സരോജിനി നന്ദി പറഞ്ഞു.
  ഉച്ചയ്ക്കു ശേഷം നടന്ന മൾട്ടിമീഡിയ മെഗാ ക്വിസിൽ ആറ് റൗണ്ട് ചോദ്യങ്ങൾ 6 പേർ അവതരിപ്പിച്ചത് പങ്കാളികൾക്കും പ്രേക്ഷകർക്കും പുതുമയാർന്ന അനുഭവമായി. സാമൂഹ്യ - സാംസ്കാരിക -വിദ്യാഭ്യാസ  പ്രവർത്തകരായ സി.എം.വിനയചന്ദ്രൻ, വാസു ചോറോട്, കെ.ശശിധരൻ അടിയോടി കൃഷ്ണദാസ് പലേരി, പി.വേണുഗോപാലൻ,
പി.വി.ഉണ്ണി രാജൻ എന്നിവരായിരുന്നു ക്വിസ് നയിച്ചത്.
       സമാപന യോഗത്തിൽ കെ.ശശിധരൻ അടിയോടി അധ്യക്ഷത വഹിച്ചു. പിലിക്കോട് ഗ്രാമപഞ്ചായത്ത് പ്രസിഡണ്ട് ടി.വി.ശ്രീധരൻ മാസ്റ്റർ മത്സര വിജയികൾക്ക് സമ്മാന പുസ്തകങ്ങളും കേഷ് അവാർഡും വിതരണം ചെയ്തു. ഒപ്പം ചരിത്രോത്സവത്തിൽ പങ്കെടുത്ത മുഴുവൻ കുട്ടികൾക്കും സർട്ടിഫിക്കറ്റും നൽകി. പി.സ്നേഹലത സ്വാഗതവും പി.വി.പ്രസീദ നന്ദിയും പറഞ്ഞു.

 ചരിത്രോത്സവ വിജയികൾ


LP വിഭാഗം:

1. അശ്വന്ത് .കെ .വി (KKNM AUPS ഓലാട്ട് )
2. ശ്രേയസ് (AUPS ആലന്തട്ട )

UP വിഭാഗം:

1. ആദിത്യ രവീന്ദ്രൻ ( GVHSS കയ്യൂർ)
2. നന്ദന .എം (GWUPS കൊടക്കാട്)

HSവിഭാഗം:

1. മാളവിക ( GHSS പിലിക്കോട്)
2. ആദിത്ത് രാജ് ( GHSS സൗത്ത് തൃക്കരിപ്പൂർ)
ഏറ്റവും മികച്ച സ്വാതന്ത്ര്യ സമര ചരിത്രപ്പതിന് പ്രത്യേക സമ്മാനം നേടിയത്:

ടി.പി. നിവേദ്യ (GLPS വൾവക്കാട്

07 September, 2017

ചെറുവത്തൂർ ബി.ആർ.സി. കുടുംബാംഗങ്ങളുടെ ഓണാഘോഷം 02.09.2017



ഭിന്നശേഷിക്കാരായ കുട്ടികൾക്കൊപ്പം ചെറുവത്തൂർ ബി.ആർ.സി. കുടുംബാംഗങ്ങളുടെ ഓണാഘോഷം -
" വാ പൂവേ ....പൊലി പൂവേ " - ശ്രദ്ധേയമായി.


നാടൻ പൂക്കളുടെ പ്രദർശനത്തോടെയായിരുന്നു തുടക്കം..ഒപ്പം സപെഷ്യലിസ്റ്റ് അധ്യാപികമാർ നേതൃത്വം നൽകിയ ഓണപ്പാട്ടിന്റെ അകമ്പടിയോടെ എല്ലാവരും ചേർന്ന് നാടൻ പൂക്കൾ മത്രം ഉപയോഗിച്ച് സ്നേഹപ്പൂക്കളം തീർത്തു.എസ്.എസ്.എ ജില്ലാ പ്രോഗ്രാം ഓഫീസർ ഡോ: എം.വി.ഗംഗാധരൻ പരിപാടി ഉദ്ഘാടനം ചെയ്തു. കുട്ടികൾക്കും, രക്ഷിതാക്കൾക്കും, ബി.ആർ.സി സ്റ്റാഫ് അംഗങ്ങൾക്കുമായി വൈവിധ്യമാർന്ന മത്സരങ്ങളും സംഘടിപ്പിച്ചു. ശ്രീ.
എം. രാജഗോപാലൻ എം.എൽ.എ കുട്ടികൾക്ക് ഓണക്കോടി വിതരണം ചെയ്തു.തൃക്കരിപ്പൂർ ഗ്രാമപഞ്ചായത്ത് പ്രസിഡണ്ട് വി.പി.ഫൗസിയ മത്സരവിജയികൾക്കുള്ള സമ്മാനദാനം നിർവഹിച്ചു. ബ്ലോക്ക് പ്രോഗ്രാം ഓഫീസർ കെ.നാരായണൻ ചടങ്ങിൽ അധ്യക്ഷത വഹിച്ചു.ബി.ആർ.സി ട്രെയിനർ പി.വി.ഉണ്ണിരാജൻ സ്വാഗതവും പി.വേണുഗോപലൻ നന്ദിയും പറഞ്ഞു. ട്രെയിനർമാരായ പി.കെ.സരോജിനി, സ്നേഹലത, ഐ.. ഇ.ഡി.സി. റിസോഴ്‌സ് അധ്യാപികമാരായ പ്രസീദ ,ലേഖ എന്നിവർക്കൊപ്പം , ഓഫീസ് ജീവനക്കാരും, എസ്.എസ്.എ നിയമിച്ച കലാ-കായിക - പ്രവൃത്തി പഠന അധ്യാപകരും പരിപാടിക്ക് നേതൃത്വം നൽകി. ഉച്ചയ്ക്ക് വിഭവസമൃദ്ധമായ ഓണസദ്യയും ഒരുക്കിയിരുന്നു. പരിപാടിക്കിടെ എം.എൽ.എ.യും മാവേലിയും കണ്ടുമുട്ടിയതും, ഇവരുടെ സൗഹൃദ സംഭാഷണവും കൗതുകക്കാഴ്ചയായി.



28 August, 2017

അവധിക്കാല പ്രവര്‍ത്തന പാക്കേജുകള്‍

  ഒന്നാം ക്ലാസ്സ് മുതല്‍ നാലാം ക്ലാസ്സ്‌ വരെയുള്ള കുട്ടികള്‍ക്കായി ഓണം അവധിക്കാലത്ത്‌  ചെയ്യാനുള്ള പ്രവര്‍ത്തനങ്ങള്‍ അടങ്ങിയ പാക്കേജുകള്‍ ചെറുവത്തൂര്‍ ബി.ആര്‍.സി. യില്‍ തയ്യാറാക്കിയിരിക്കുന്നു. അവധി ദിനങ്ങളില്‍ നിശ്ചിത ദിവസങ്ങളില്‍ കുട്ടികള്‍ പ്രവര്‍ത്തനങ്ങള്‍ പൂര്‍ത്തിയാക്കി വിദ്യാലയം തുറന്ന ശേഷം അധ്യാപകര്‍ക്ക് വിലയിരുത്താം 

ഐ.ഇ.ഡി.സി - പരിഹാരബോധന ക്ലാസുകൾക്ക് തുടക്കമായി -26.08.2017



         സർവശിക്ഷാ അഭിയാൻ ചെറുവത്തൂർ ബി ആർ സി യുടെ ആഭിമുഖ്യത്തിൽ പ്രത്യേക പരിഗണന അർഹിക്കുന്ന കുട്ടികൾക്കുള്ള പരിഹാരബോധന ക്ലാസുകൾക്ക് തുടക്കമായി.ചെറുവത്തൂർ ബി ആർ സി, കൂലേരി ജി എൽ പി സ്കൂൾ, ചീമേനി ഗവ.ഹയർ സെക്കന്ററി സ്കൂൾ എന്നിവിടങ്ങളിലാണ് ക്ലാസുകൾ ഉദ്ഘാടനം ചെയ്യപ്പെട്ടത്.                                ഇനിയുള്ള എല്ലാ ശനിയാഴ്ചകളിലും കുട്ടികളിലേക്ക് പാഠ്യ വസ്തുതകൾ എളുപ്പത്തിലെത്തിക്കാനുള്ള നൂതന പ0ന പ്രവർത്തനങ്ങളോടെയുള്ള ക്ലാസുകൾ നടക്കും. ഐ സി ടി സാധ്യതകൾ, വർക്ക് ഷീറ്റുകൾ, ചിത്രകാർഡുകൾ തുടങ്ങിയവ ഉപയോഗിച്ചുള്ളതാകും ക്ലാസുകൾ .കുട്ടികളുടെ പഠന പ്രവർത്തനങ്ങളിൽ രക്ഷിതാക്കളെ കൂടുതൽ ഇടപെടുവിച്ചുകൊണ്ടും അവർക്ക് പരിഗണന ലഭിക്കുന്നതിനുമുള്ള തരത്തിൽ രക്ഷിതാക്കൾക്കുള്ള ബോധവൽക്കരണവും ഉദ്ഘാടനത്തിന്റെ ഭാഗമായി നടന്നു.                   ചെറുവത്തൂർ ബി ആർ സി കേന്ദ്രത്തിൽ പിലിക്കോട് ഗ്രാമപഞ്ചായത്ത് പ്രസിഡന്റ് ടി വി ശ്രീധരൻ ഉദ്ഘാടനം ചെയ്തു.പി വി പ്രസീദ സംസാരിച്ചു.കൂലേരി ജി എൽ പി സ്കൂളിൽ ബി ആർ സി ട്രെയിനർ പി വേണുഗോപാലൻ ഉദ്ഘാടനം ചെയ്തു.പി ടി എ പ്രസിഡന്റ് വി എം ബാബുരാജ് അധ്യക്ഷനായിരുന്നു.പി കെ സരോജിനി, എം ധന്യ എന്നിവർ സംസാരിച്ചു.ചീമേനി ഗവ.ഹയർ സെക്കന്ററി സ്കൂളിൽ ഗ്രാമ പഞ്ചായത്ത് മെമ്പർ കെ രതീശൻ ഉദ്ഘാടനം ചെയ്തു.കെ ഈശ്വരൻ അധ്യക്ഷനായിരുന്നു.പി സ്‌നേഹലത, സി വി ലേഖ എന്നിവർ സംസാരിച്ചു.      
    

16 August, 2017

സ്വതന്ത്ര ദിനാഘോഷം വിവിധ സ്കൂളുകളില്‍




" ജീവിക്കാൻ അനുവദിക്കൂ" കുട്ടികളുടെ അവകാശ പ്രഖ്യാപന റാലി

യുദ്ധഭീകരതയ്‌ക്കും  പ്ലാസ്റ്റിക് ഭീകരനുമെതിരെ'  ജീവിക്കാൻ അനുവദിക്കൂ എന്ന മുദ്രാവാക്യവുമായി കുട്ടികൾ നടത്തിയ അവകാശ പ്രഖ്യാപന റാലി നാടിന് ആവേശവും മാതൃക പകരുന്നതുമായി. ഹിരോഷിമ നാഗസാക്കി ദിനാചരണങ്ങളുടെയും ക്വിറ്റിന്ത്യാ ദിനത്തിന്റെയും ഭാഗമായി ബിആർസി ചെറുവത്തൂരും പിലിക്കോട് ഗ്രാമപഞ്ചായത്തുമാണ് കാലിക്കടവ് ടൗണിൽ നൂറുകണക്കിന് കുട്ടികളെ അണിനിരത്തി റാലി സംഘടിപ്പിച്ചത്.
         ചന്തേര ജി യു പി സ്കൂൾ ,പിലിക്കോട് ജി യു പി സ്കൂൾ, ചന്തേര ഇസ്സത്തുൽ ഇസ്ലാം എ എൽ പി സ്കൂൾ എന്നിവിടങ്ങളിലെ കുട്ടികളും അധ്യാപകരും സഡാക്കോ കൊക്കുകളും പ്ലക്കാഡുകളുമേന്തി യുദ്ധവിരുദ്ധ - പ്ലാസ്റ്റിക് വിരുദ്ധ മുദ്രാവാക്യങ്ങളുമായി റാലിയിൽ അണിനിരന്നു .
                                   No War...........No Pollution
                                  Quit Plastic....Save Earth
                                  Save Life.........Let Live

             ഇതോടനുബന്ധിച്ച് കുട്ടികളും ചിത്രകലാധ്യാപകരും ഒന്നിച്ചണിനിരന്ന 
ബിഗ് ക്യാൻവാസ് ചിത്രരചനയും, എസ്.എസ്.എ നിയമിച്ച സ്പെഷ്യലിസ്റ്റ് അധ്യാപകർ നയിച്ച മാനവ സൗഹൃദ സംഗീത സദസ്സും പരിപാടിയെ മിഴിവുറ്റതാക്കി. തുടർന്ന് നടന്ന അവകാശ പ്രഖ്യാപനത്തിലും പ്രതിജ്ഞയിലും കുട്ടികൾക്കൊപ്പം മുതിർന്നവരും പങ്കാളികളായി.       
             പിലിക്കോട് ഗ്രാമപഞ്ചായത്ത് പ്രസിഡന്റ് ടി വി ശ്രീധരൻ മാസ്റ്റർ  
റാലി  ഉദ്ഘാടനം ചെയ്തു. ചന്തേര ഗവ:യു.പി സ്കൂൾ പ്രധാനാധ്യാപകൻ ടി വി ബാലകൃഷ്ണൻ അധ്യക്ഷനായിരുന്നു. ചെറുവത്തൂർ എ.ഇ.ഒ    ടി എം സദാനന്ദൻ, ബിപിഒ  കെ നാരായണൻ,  വി പി രാജീവൻ, 
പ്രമോദ് അടുത്തില, സാജൻ ബിരിക്കുളം, ശ്യാമപ്രസാദ്, സൗമ്യമോൾ, പി വി ഉണ്ണി രാജൻ, പി വേണുഗോപാലൻ എന്നിവർ സംസാരിച്ചു.
     തുടർന്ന് 'മാലിന്യത്തിൽ നിന്ന് സ്വാതന്ത്ര്യം' ക്യാമ്പെയിനിന്റെ  ഭാഗമായി പിലിക്കോട് ഗ്രാമപഞ്ചായത്ത്  സംഘടിപ്പിച്ച Quit plastic പരിപാടിയുടെ പ്രചാരണാർഥം പ്രശസ്ത ശില്പി സുരേന്ദ്രൻ കൂക്കാനം കാലിക്കടവ് ബസ് സ്റ്റോപ്പിൽ  പാഴ്വസ്തുക്കളാൽ തീർത്ത  ശില്പം ആർ.ഡി.ഒ  ഡോ. പി.കെ.ജയശ്രീ  അനാച്ഛാദനം ചെയ്തു.












അമ്മമാരുടെ രചനാ ശില്പശാലയുടെ രണ്ടാം ഘട്ടം പൂര്‍ത്തിയാക്കി ..



കുട്ടികൾക്ക് വേണ്ടി അമ്മമാരുടെ രചനാ ശില്പശാല രണ്ടാം ഘട്ടം പൂർത്തിയായി
കുട്ടികളെ മികച്ച വായനക്കാരും അതുവഴി അക്കാദമിക മികവിന്റെ ഉടമകളും ആക്കുന്നതിന്റെ ഭാഗമായി വിദ്യാലയത്തിൽ രക്ഷിതാക്കളുടെ രചനാ ശില്പശാലയുടെ രണ്ടാം ഘട്ടംഇന്ന് നടന്നു. ധാരാളം വായനാ കാർഡുകൾ വായിച്ച് വായനാകാർഡിന്റെ പ്രത്യേകതകൾ മനസ്സിലാക്കുന്ന പ്രവർത്തനമാണ് ആദ്യം നടന്നത്. കുറുകിയ വാക്യങ്ങൾ. വ്യത്യസ്തമായ വാക്യശൈലി, ഭാഷാപ്രയോഗങ്ങൾ.വൈവിധ്യമാർന്ന പദങ്ങൾ. എന്നിവയൊക്കെ ശ്രദ്ധയിൽ പെടുത്തി.തുടർന്ന് ഒരാൾ തയ്യാറാക്കിയ കഥ എല്ലാവർക്കും നൽകി. മുകളിൽ കണ്ടത്തിയ സാധ്യതകൾ പരിഗണിച്ച് എല്ലാവരും കഥയെ എഡിറ്റ് ചെയ്തു. എല്ലാവരും അവരുടേതായ രീതിയിൽ കഥ മാറ്റിയെഴുതി. കൂടുതൽ മെച്ചപ്പെടുത്തൽ ആവശ്യമാണെന്ന് പിന്നീടുള്ള ചർച്ചയിൽ ബോധ്യപ്പെട്ടു.ആർ പി വേർഷൻ അവതരിപ്പിച്ച് ബോധ്യപ്പെടുത്തി.തുടർന്ന് ഗ്രൂപ്പിൽ കൂടുതൽ രചനകൾ നൽകി മെച്ചപ്പെടുത്താൻ ശ്രമിച്ചു. അങ്ങനെ ഒരു പരിധി വരെ രക്ഷിതാക്കൾ രചന മെച്ചപ്പെടുത്തുന്ന രീതി മനസ്സിലാക്കി. കുറേക്കൂടി രചനകൾ നടത്താനുള്ള ചിത്രങ്ങൾ എല്ലാവർക്കും നൽകിയാണ് ശില്പശാല അവസാനിച്ചത്




25 July, 2017

സാർ,
          ചെറുവത്തൂർ ബി ആർ സി യുടെയും വനം വന്യജീവി വകുപ്പ് സാമൂഹ്യ വനവൽക്കരണ വിഭാഗ ത്തിന്റെയും സംയുക്തഭിമുഖ്യത്തിൽ ലോക കടുവാ ദിനമായ ജൂലൈ 29 ന് രാവിലെ 9.30ന് ബി ആർ സി യിൽ  വനം-വന്യ ജീവി സെമിനാർ സംഘടി പ്പിക്കുന്നു.നീലേശ്വരം ബ്ലോക്ക് പഞ്ചായത്ത് പ്രസിഡന്റ് വി പി ജാനകി  സെമിനാർ ഉദ്ഘാടനം ചെയ്യും. പരിസ്ഥിതി  പ്രവർത്തകൻ ടി.പി.പത്മനാഭൻ മാസ്റ്റർ വിഷയാവതരണം നടത്തും.
      ഇതോടനുബന്ധിച്ച് വന്യജീവി ഫോട്ടോ പ്രദർശനം, ക്വിസ് മത്സരം എന്നിവയും നടക്കും. ജൂലൈ 26 ന് ഉച്ചയ്ക്ക്  2 മണിക്ക് സ്കൂൾ തലത്തിൽ സംഘടിപ്പിക്കുന്ന യു പി വിഭാഗം ക്വിസിൽ ഒന്നും രണ്ടും സ്ഥാനം നേടുന്ന കുട്ടികളാണ് സെമിനാറിൽ പങ്കെടുക്കേണ്ടത്.
ഇവർക്ക് ഒരു ടീം ആയി ക്വിസ് മത്സരത്തിൽ പങ്കെടുക്കാം. മത്സരത്തിൽ ഒന്നും രണ്ടും മൂന്നും സ്ഥാനം നേടുന്ന ടീമുകൾക്ക്‌ സമ്മാനം നൽകും. യു.പി.വിഭാഗം ഉള്ള എല്ലാ  വിദ്യാലയങ്ങളും    നിർബ്ബന്ധമായും കുട്ടികളെ പങ്കെടുപ്പിക്കേണ്ടതാണ്. പരിപാടി 3 മണി വരെയെങ്കിലും നീണ്ടു നിൽക്കും.(ഉച്ചഭക്ഷണം ഏർപ്പാടാക്കിയിട്ടുണ്ട്.)
       ജൂലൈ 26 ന് ബുധനാഴ്ച ഉച്ചയ്ക്ക് 2 മണിക്ക് സ്കൂൾ തലത്തിൽ എൽ പി, യു പി വിഭാഗങ്ങൾക്കായി വനം-വന്യജീവി ക്വിസ് നടത്തുന്നതിനുള്ള പൊതു ചോദ്യങ്ങൾ  26 ന് രാവിലെ 10 മണിക്ക് സ്കൂളുകളിലേക്ക് മെയിൽ അയക്കും. ആവശ്യമായവ തെര ഞ്ഞെടുത്ത് ഓരോ  സ്കൂളി ന്റെയും സാധ്യതയ്ക്കനുസരിച്ച് ക്ലാസ്സ് തലത്തിലോ, സ്കൂൾ തലത്തിലോ ക്വിസ് മത്സരം സംഘടിപ്പിച്ച് വിജയികളെ കണ്ടെത്തണം.(യു.പി.യിലെ മികച്ച 2 കുട്ടികളെ മാത്രമാണ് ബി.ആർ.സി തല സെമിനാറിലും ക്വിസ് മത്സരത്തിലും പങ്കെടുപ്പിക്കേണ്ടത്.)
                         ബി.പി.ഒ,
       ബി.ആർ.സി, ചെറുവത്തൂർ

20 July, 2017

അക്കാദമിക മികവിനായി അമ്മക്കൂട്ടം രചനോല്‍സവം


    കുട്ടികളുടെ വായനയെയും എഴുത്തിനെയും കൂടുതൽ മികവുറ്റതാക്കാൻ അമ്മമാരുടെ രചനാശില്പശാല.കയ്യൂർ ഗവ.എൽപി സ്കൂളിലെ അമ്മക്കൂട്ടമാണ് വിദ്യാലയ ത്തിൻറെ അക്കാദമികമികവിനായി ഒത്തുകൂടിയത്.

        ഒരേ ആശയത്തെ കഥകളായും കവിതകളായും രൂപപ്പെടുത്തുന്ന പ്രവർത്തനത്തോടെയായിരുന്നു ശില്പശാലയ്ക്ക് തുടക്കം.  ചിത്രങ്ങൾക്ക്അടിക്കുറിപ്പു തയാറാക്കിയും പിന്നീട് ആ ചിത്രസന്ദർഭത്തിന്
മുമ്പും ശേഷവും എന്ത് സംഭവിച്ചിട്ടുണ്ടാകും എന്നുചിന്തിച്ചും അവർ രചനകളിലേക്കു കടന്നു.അമ്മമാരുടെ വിരൽത്തുമ്പിൽ നിന്ന് കഥകളും കവിതകളും വിവരണങ്ങളും ഉണ്ടാകാൻ പിന്നെ അധിക സമയം വേണ്ടിവന്നില്ല.
         വായിച്ചവതരിപ്പിച്ചും, ചർച്ച ചെയ്തും   സ്വയം വിലയിരുത്തലിലൂടെയും പരസ്പര വിലയിരുത്തലിലൂടെയും രചനകളെ മെച്ചപ്പെടുത്താനും മികവുറ്റതാക്കാനുമുള്ള  പ്രക്രിയയാണ് പിന്നീട് നടന്നത്. ഇത് ഏറെ ഫലപ്രദമായെന്ന് അമ്മമാർ വിലയിരുത്തി.
            വരും ദിവസങ്ങളിൽ കൂടുതൽ രചനകൾ തയാറാക്കി വിദ്യാലയത്തിന്റെ സ്വന്തമായ വായനാ കാർഡുകളൊരുക്കി അച്ചടിച്ച് കുട്ടികളുടെ വായനയ്ക്കും എഴുത്തിനുമായി പ്രയോജനപ്പെടുത്താൻ കഴിയുമെന്ന ആത്മവിശ്വാസത്തിലാണ് കയ്യൂരിലെ അമ്മക്കൂട്ടം.ശക്തമായ പിന്തുണയുമായി അധ്യാപക രക്ഷാകർത്തൃ സമിതിയും മദർ പി.ടി.എ യും ഒപ്പമുണ്ട്.

          കയ്യൂർചീമേനി ഗ്രാമപഞ്ചായത്ത് പ്രസിഡണ്ട് കെ ശകുന്തള  രചനാ ശില്പശാല ഉദ്ഘാടനം ചെയ്തു.വാർഡ്മെമ്പർ  മോഹനൻ.പി.പി അധ്യക്ഷത വഹിച്ചു.  പിടിഎ പ്രസിഡന്റ് കെ രാജൻ, വൈസ് പ്രസിഡണ്ട് സുന്ദരൻ .സി ,മദർ പി.ടി.എ പ്രസിഡണ്ട് പ്രസീന.കെ.വി എന്നിവർ സംസാരിച്ചു.    

               ബി.ആർ.സി.ട്രെയിനർ ഉണ്ണിരാജൻ.പി.വി, പ്രഥമാധ്യാപിക പങ്കജാക്ഷി.സി, അധ്യാപികമാരായ രതി, വത്സല, ഉഷാകുമാരി എന്നിവർ ശില്പശാലയ്ക്ക് നേതൃത്വം നൽകി.